Иранската државна телевизија денеска објави дека Техеран добил нацрт на иницијален неофицијален рамковен документ за меморандум за разбирање со Соединетите Американски Држави, пренесува Ројтерс.

Според нацртот, Иран би дозволил обновување на комерцијалниот бродски сообраќај низ Ормускиот Теснец на ниво од пред војната во рок од еден месец, додека САД би ги повлекле воените сили од регионот околу Иран и би ја укинале поморската блокада на Ормуз.

Иранската државна телевизија наведе и дека нацртот на рамката, кој го исклучува минувањето на воени бродови и предвидува Иран да управува со бродскиот сообраќај низ Ормускиот Теснец во соработка со Оман, сè уште не е финализиран и дека Техеран нема да преземе никакви чекори без „опиплива верификација“.

Доколку конечниот договор биде постигнат во рок од 60 дена, тој треба да биде потврден со резолуција на Советот за безбедност на Обединетите нации. Меморандумот за разбирање меѓу САД и Иран треба да произлезе од индиректните преговори за завршување на војната, во кои Пакистан имал централна улога како посредник.

Високиот ирански функционер Али Багери претходно денеска изјави дека Иран и Оман водат преговори за воспоставување нов режим на минување низ Ормускиот Теснец, еден од најважните светски поморски патишта за транспорт на нафта и течен природен гас, кој е затворен по американско-израелските напади врз Иран кон крајот на февруари.

„Како соседни држави, Иран и Оман преговараат додека не се утврди нов механизам за минување низ Ормускиот Теснец“, изјави на маргините на меѓународниот безбедносен форум во Москва заменик-секретарот на Врховниот совет за национална безбедност на Иран.

Американскиот државен секретар Марко Рубио вчера изјави дека разговорите со Иран за продолжување на прекинот на огнот и повторното отворање на Ормутскиот Теснец ќе траат уште неколку дена.

Договорот за мир со Иран е при крај, Ормускиот Теснец набргу пак ќе се отвори, вели Трамп