Организаторот на ОИ во Токио ќе вакцинира 40.000 волонтери
Организацискиот одбор на Олимписките игри во Токио, соопшти дека ќе се вакцинираат 40.000 работници односно волонтери кои ќе учествуваат како поддршка на најголемиот спортски настан на светот.
– Работиме на тоа сите кои ќе бидат дел од Игрите да ги имунизираме со што можноста за ширење на коронавирусот драстично ќе се намали – изјави Тамајо Марукава, министерот задолжен за Олимписките игри.
Процесот на вакцинација ќе започне на 17. јуни во тренинг центарот во Токио. Главниот град на Јапонија сè уште е под вонредна состојба, а здравствените работници се загрижени бидејќи поради Олимписките игри може да се зголеми ширењето на заразата.
Организаторот исто така соопшти дека сите учесници на ОИ ќе добијат прирачник во кој ќе биде објаснето како мора да се однесуваат, а доколку не ги почитуваат мерките ќе бидат исфрлени од Игрите. Според најавите, спортистите и претставниците на медиумите нема да смеат слободно да се движат низ Токио иако се вакцинирани и единствена релација ќе им биде од хотелите до спортските борилишта и назад.