Сопствениците на хаварисани возила кои узурпираат тротоари и паркиралишта во општина Кисела Вода ќе мора во наредните денови да си ги тргнат неупотребливите возила од  јавниот простор.

Инспекциските служби на Кисела Вода, како што информираат оттаму се на терен и оставаат  известувања за отстранување на возилата во неупотреблива состојба.

Врз основа на мапирањето направено во соработка со месните заедници, ги лоцираме сите точки каде што овие возила ги блокираат паркинзите, тротоарите и зелените површини. Сопствениците имаат рок од 10 дена сами да ги дислоцираат своите возила. Ова е неопходно за да го ослободиме просторот за пешаците и да овозможиме нормално движење низ нашите населби – велат од Кисела Вода.

Доколку возилата не бидат отстранети во предвидениот рок, општинските служби најавуваат дека ќе изготват решенија за нивно подигнување од страна на колективниот постапувач „Грин Роад“ до собирното место наменето за таа цел.