Општина Чаир го прогласи пензионираниот американски генерал Весли Кларк за почесен граѓанин, објаснувајќи дека тоа се прави „како признание за неговиот извонреден придонес во зајакнувањето на мирот и стабилноста на Балканот“, објави „Алсат“.

Градоначалникот на Чаир, Висар Ганиу, пред да му додели признание, рече дека придонесот на генералот Кларк е „колосален за стабилноста на регионот“.

Кларк беше врховен командант на НАТО во Европа за време на интервенцијата на Алијансата во Косово и бомбардирањето на тогашна СР Југославија и командуваше со операцијата „Сојузничка сила“.

„Вашата непоколеблива заложба за заштита на човековиот интегритет и достоинство испрати јасна порака до целиот свет, дека мирот не е само прашање на стратешки интереси, туку морална посветеност за заштита на животот и основните права на секој поединец“, рече Ганиу на денешната свеченост.

„Тоа беше момент пред 25 години и се сеќавам дека имаше загриженост, конфузија, напнатост. Имаше гласини за конфликт. Имаше проблеми во планините овде меѓу Косово и Македонија и некако по сето ова, се појави мирот и демократијата. Денес е привилегија да се биде овде во Скопје и да се види мир, просперитет и да се чувствува ентузијазам, надеж и доверба за иднината“, рече Весли Кларк.