Стотици граѓани на Бирмингем, Англија, чекаа новогодишен огномет во центарот на градот, кој дури и не бил закажан, пишува британскиот весник Телеграф.

Граѓаните беа измамени со лажни објави на социјалните мрежи, и покрај известувањето на локалната полиција дека нема да има огномет.

Ова не е прв пат граѓаните на Бирмингем да бидат измамени. Дури и минатата година, на социјалните мрежи имаше наводни најави дека ќе има претстави, тезги со храна и „величествен огномет“ во центарот на градот, а полицијата потоа издаде известување дека најавите се лажни.

Во центарот на градот Бирмингем немало огномет од 2017 година, но реклами со огномет постојано се појавуваат на социјалните медиуми.

-Секоја година, на мрежите почнуваат да се шират гласини за големи прослави во градот. За жал, овие лажни тврдења често водат до забуна и разочарување. Минатата година, на пример, бевме свесни за најавите што циркулираа за спектакуларна претстава на стогодишнината. Многу луѓе веруваа во тоа, отидоа во центарот на градот и беа несреќни кога ништо не се случи – рече портпаролот на локалната полиција.

Полицијата беше на плоштадот и ја информираше толпата дека нема огномет.