Вооружени лица денеска напладне ограбија експозитура на „Уни банка“ во населбата Капиштец во Скопје. Напаѓачите одзеле пари од вработените, а едно од лицата отворило и оган од огнено оружје. Според првичните информации, нема повредени лица.

Поради нападот во центарот на градот денеска имаше засилени полициски контроли и возила, кои се обидуваа да ги пронајдат крадците. Тоа предизвика и застој во сообраќајот.

„На 8.3.2022 во 12:35 часот во Полициската станица Центар било пријавено дека од експозитура на банка на подрачје на Центар, три лица со закана со оружје од вработените одзеле пари, по што во близина на местото на настанот едно од лицата испукало еден куршум“, велат од МВР.

Оттаму додаваат и дека нема повредени лица во инцидентот и дека се преземаат мерки за расчистување на случајот. Истражните органи ги прибавиле и ги прегледале видеоснимките од околните безбедносни камери.