Одредена мерка притвор за 19-годишник од Тетово кој силуваше малолетничка
По предлог на јавен обвинител до судијата во Основниот суд Тетово беше доставен предлог за определување мерка притвор за 19-годишник кој на 12 април оваа година силуваше 14-годишно девојче од Тетово. Предлогот е прифатен, а на осомничениот определен му е притвор во траење од 30 дена.
Како што информираат од ОЈО Тетово, осомничениот на 12 април во близина на маркет кај старите згради на Државниот универзитет во Тетово, со употреба на сила и закана, извршил полов напад врз 14-годишно девојче.
Тој, заедно со уште едно непознато лице, ја пречекале жртвата во една уличка додека одела кон маркетот. Осомничениот, инаку нејзин сосед, ја повлекол за раката кон паркирано возило во близина. Другото лице го отклучило автомобилот, по што осомничениот ја удрил оштетената по лицето и ја натерал да влезе внатре на задното седиште. Со возилото управувало непознатото лице, кое ги заклучило вратите и ги одвело 200 метри подалеку, по што го паркирало возилото и излегло. На задното седиште останале осомничениот и оштетената, а тој со употреба на сила го принудил девојчето на полови дејствија. Потоа му се јавил на непознатото лице и заедно со автомобилот ја вратиле жртвата од местото каде што ја зеле, се вели во соопштението.
Осомничениот и се заканил дека ќе ја убие доколку каже некому за настанот.