На состанокот на Европската радиодифузна унија (ЕБУ) одржан денес, беше одлучено Израел да биде дел од Изборот за песна на Евровизија во Виена во 2026 година.

Земји како Ирска, Шпанија, Холандија и Словенија најавија бојкот доколку Израел учествува, додека Германија сигнализираше дека ќе се повлече доколку Израел биде исклучен. Токму поради ова, претставниците на Евровизија се состанаа денес, 4 декември, и по неколку часа ја донесоа конечната одлука.

Европската радиодифузна унија (ЕБУ) официјално потврди дека Израел ќе учествува на Евровизискиот натпревар за песна 2026 година. Оваа одлука дојде откако ЕБУ се откажа од плановите за одржување гласање за учеството на Израел, кое првично беше закажано поради загриженоста на неколку земји-членки за политичките импликации од учеството на Израел во услови на тековниот конфликт во Газа.

Минатиот месец, ЕБУ објави и промени во правилата за гласање за да се ограничи влијанието на владите и координирани промотивни напори.  Организаторите рекоа дека на радиодифузерите и изведувачите нема да им биде дозволено „активно да учествуваат, да овозможуваат или да придонесуваат во промотивни кампањи на трети страни кои би можеле да влијаат на гласањето“.

Од следната година, обожавателите ќе можат да дадат само 10 гласови наместо 20, а новите мерки ќе бидат насочени кон измамнички или координирани активности на гласање. Жирито, исто така, ќе се врати во полуфиналето.

Финалето на 70-от Евровизиски музички натпревар ќе се одржи на 16 мај, додека полуфиналето ќе се одржи претходно истата недела на истото место во Виена. Ова ќе биде третпат Виена да биде домаќин на ова натпреварување, а последен пат тоа се случи во 2015 година.