Папата Лав Четиринаесетти ја одбележува првата годишнина од својот понтификат како една од највлијателните фигури на светската политичка сцена, пишува „Си-ен-ен“.

Во изминатата година папата постепено се претвори од умерен и повлечен црковен лидер во гласен и влијателен критичар на војните, авторитаризмот и глобалните тензии.

Посебно внимание предизвикаа неговите критики за конфликтите на Блискиот Исток, трката за вооружување и политиките на американскиот претседател Доналд Трамп, што доведе и до отворени тензии меѓу Ватикан и дел од американските конзервативци.

Папата во меѓувреме доби силна поддршка меѓу католиците ширум светот поради пораките за мир, социјална правда, помош за мигрантите и обидите да ја задржи Црквата обединета во период на големи глобални поделби.

Сепак, неговото владеење не е целосно имуно на критика.

„Кога станува збор за програмската, теолошка и црковно-политичка насока, и натаму е нејасен правецот на папата Лав. Сè уште нема енциклика, односно ниту еден голем поучен документ од Лав“. Па така „останува отворено на каде теолошки води овој папа“, вели црковниот историчар од Аугсбург, Јерг Ернести, во разговор со Дојче веле.

Лав се залага за „невооружен и разоружувачки мир, скромно и упорно“. Со тоа во голема мерка ја следи линијата на својот претходник, папата Франциско, кој во повеќе наврати се изјаснуваше за рускиот напад врз Украина и конфликтот во Газа. Милитаристички обележаната надворешна политика на американскиот претседател Доналд Трамп на мотивот мир му дава дополнителна важност – американското мешање во Венецуела, заканите за Куба и Гренланд, војната против Иран, пишува германскиот јавен медиум.

Лав Четиринаесетти денес веќе не се гледа само како верски лидер, туку како глобален морален авторитет кој сè почесто влегува во директен судир со големите светски сили и политички лидери.

Папа Лав XIV: Немам интерес да се расправам со Трамп