Доколку дозволат временските услови, од идниот понеделник Општина Кисела Вода и ЈП „Паркови и зеленило“, ќе започнат еднонеделна акција за чистење и уредување на парковите и јавните зелени површини на целата територија на општината.

Како што соопштија од Општина Кисела Вода, акцијата ќе се реализира со целата расположлива механизација и теренски екипи, а ќе опфати собирање на лисна маса, расчистување на паднати гранки и отпадоци, поткастрување на дрвја, сечење суви гранки, како и уредување на јавните тревници. Активностите ќе се одвиваат низ парковите и сите јавни зелени површини во Кисела Вода, а вакви акции, како што тврдат, ќе бидат чести и во иднина.

Со директорот на ЈП „Паркови и зеленило“, Муамер Сефери, договоривме засилена соработка и конкретни чекори за подобрување на изгледот на нашата општина. Доколку временските услови дозволат, од понеделник започнуваме еднонеделна интензивна акција за чистење и уредување на парковите и јавните зелени површини, со целата расположлива механизација. Нашата цел е Кисела Вода да биде почиста, поуредена и попријатна за живеење, а ваквите акции ќе продолжат и во наредниот период. Воедно, ги повикувам и граѓаните заеднички да придонесеме кон почиста животна средина, со одговорно однесување и грижа за заедничките јавни простори, изјави градоначалничката Бети Стаменкоска Трајкоска.