Крадци украле полжави во вредност од 90.000 евра од фарма на северот од Франција, која снабдува врвни ресторани. Фармата L’Escargot Des Grands Crus од Бузи, во близина на Ремс, објави дека ѝ ја снемало целата залиха од свежи и замрзнати полжави, што го опиша како „вистински удар“ пред празничната сезона, пишува Би-Би-Си.

Кражбата се случила пред една недела, а крадците ја пробиле оградата за да влезат во помошните згради. Случајот бил пријавен во полиција дури подоцна во текот на неделата, а истрагата е во тек. Во меѓувреме, фармата се бори да се надополни за да ги задоволи голем број нарачки за крајот на годината.

Шок и неверица во пресрет на празникот

„Ова дефинитивно не е вид на објава што мислевме дека ќе ја напишеме додека се приближуваат празниците“, објави L’Escargot Des Grands Crus. Тие го опишаа инцидентот како „шок, недоразбирање и вистински удар за целиот тим“, додавајќи дека: „Се трудиме да се надополниме за да ве задоволиме за празниците“.

Менаџерот на фармата, Жан-Матје Доверњ, го потврди обемот на кражбата.

„Целиот готов производ беше украден од продавницата, како и залихите на суровини од мојата лабораторија. Тоа беше мојата залиха за крајот на годината… Имавме доволно за да ги поминеме празниците без никакви грижи.“

Омилениот деликатес цел на крадци

Полжави се француски деликатес кој традиционално се подготвува со путер, лук или вино. Нивната продажба значително се зголемува во декември, кога стануваат неопходен дел од празничната трпеза за време на божиќните и новогодишните прослави.

Украдената стока била наменета за ресторани, вклучувајќи го и ресторанот Les Crayères во Ремс, кој има ѕвездичка Мишелин, како и за разни продавници за деликатеси и приватни клиенти.