Основното јавно обвинителство Струга соопшти дека оформило предмет во врска со уривањето на спомен-куќата на Владо Малески при вршење градежни работи во близина на објектот од страна на фирма од Велешта.

Обвинител на 16 октомври извршил увид на местото во присуство на вештак од градежната струка.

„Наредено е вештачење, а се преземаат и други дејствија за испитување на околностите под кои се случил настанот“, пишува во соопштението на ОЈО.

При изведба на градежни работи на индивидуален објект во старото градско јадро беше срушен јужниот ѕид и дел од кровната конструкција од куќата заштитена како културно наследство. Министерот за култура најави изработка на проект за обнова и реставрација на спомен-куќата на книжевникот Малески, кој е автор на стиховите на нашата државна химна „Денес над Македонија се раѓа“.