Објавена е книгата „Естетика на стрипот“ од Бошко Караџов
Книгата „Естетика на стрипот“ од д-р Бошко Караџов е збирка на огледи од областа на филозофијата и стрип-уметноста. Истата е поделена во три целини.
Во првиот дел со наслов „Онтологија на деветтата уметност“ се говори за одделната естетичка природа на графичкиот роман и за обрасците на создавањето дигитални (с)ликовни раскази во рамките на концептот за бесконечното платно.
Во вториот дел со наслов „Историја на стрипот“ е претставена повеста на (с)ликовното приповедање од праисториските почетоци во пештерското сликарство, преку средновековните графички раскази, сѐ до воспоставувањето на модерниот стрип-формат во XIX век.
Во завршното поглавје, со наслов „Идеологија и стрип-кулура“ се говори за анти-стриповската книга „Seduction of the Innocent“, за појавата на андерграунд стрип-сцената, како и за македонските стрипови од едицијата „Никогаш роб“.
Бошко Караџов е филозоф, теоретичар на културата, професор и научен истражувач во полето на графичката литература и интермедијалните уметности.
Автор е на книгите: „Парадоксите на индуктивната логика“ (2020), „Compendium philosophiae“ (2021) и „Логичка анализа на научното познание“ (2021). „Естетика на стрипот“ (2022) е негова четврта книга. Истата, со поддршка на Министерството за култура, е издание на издавачката куќа „Стрип-квадрат“ и наскоро ќе биде достапна низ книжарниците во Скопје и во Велес.