Нуредини: Ние прво баравме пластична кеса да чини десет денари, пратениците бараа 20 и се најдовме на средина
Нашиот првичен предлог како министерство беше десет денари за кеса. Кога дојде законот во Собрание, пратениците побараа со амандман да биде 20 денари. Се договоривме да биде 15 денари, рече министерот за животна средина, Насер Нуредини во интервју за ТВ Сител, говорејќи за најновата цена на биоразградливите кеси во продавниците и маркетите.
Според него, идејата на покачувањето на цената не е околу вредноста на кесата.
-Идејата на кеса од 10 денари е да се обидеме да ги мотивираме граѓаните да не ги користат пластичните кеси. Тие не се разградливи едноставно во природата. Тие се распаѓаат и ја загадуваат почвата и водата. Идејата не е цената, туку да се користи помалку пластика. Ние гледаме на 10-те денари како на 15 центи и тоа е цена која ќе мотивира помалку да се користат, смета Нуредини.
„Ние како влада донесовме одлука да не се користи пластика во министерствата. Веќе една година користиме само стакло и водата мора да биде во стакло, јас барав нашите автомобили да не бидат дизел, но има процеси на јавни набавки за кои се одлучуваше лани. Ние бараме новите возила кои ќе се купуваат за институциите да бидат еколошки, плагин, хибридни или електрични. Затоа што треба да поставиме пример. Министерството за финансии работи на проект за намалување на ДДВ за електрични автомобили, за да стимулираме и да ги поддржиме граѓаните да купуваат еколошки возила а не дизел или бензин“, додаде Нуредини.