Сојузот на синдикати на Македонија (ССМ) доби нов лидер – од денеска на чело на најголемата синдикална организација е Слободан Трендафилов, кој како единствен кандидат беше избран за нов претседател на ССМ на денешниот Конгрес во Скопје.

Трендафилов во вечерашното гостување во „Топ тема“ на „Телма“ рече дека во текот на претстојната недела се најавени штрајкови или протести во три државни институции, без да ги открие институциите.

-Ова ќе биде жешко лето, не само по однос на температурите, туку и по однос на синдикалните активности – најави Трендафилов.

Тој посочи дека ССМ подготвува иницијатива за уставноста на Законот за работни односи со кој се воведе можноста за работна недела која трае 72 часа.

Конгресот на ССМ почна со едноминутно молчење во знак на почит кон претходниот претседател на Сојузот, Дарко Димовски, кој почина овој месец.