Колективот „Гола Планина“ на 3 март, со почеток во 12 часот, во Градскиот парк во Скопје, на локацијата наречена „Лепеза“, ќе го одржи првото издание на „Сепак се врти“, потполно независен DIY (Do It Yourself) фестивал, кој му пркоси на зачмаеното стоење во место со музика и другарство.

– Додека градот се дави во сопствената статика, овој фестивал е тука да докаже дека светот не се врти околу скопската ентропија – потенцираат од „Гола Планина“.

Присуството е бесплатно, но можете да го поддржите фестивалот со тоа што ќе си купите „карта-стикер“ однапред во „Котур“, „Олд скул“, „Микропаб“, „Буква“, како и со донации на самиот настан. На целодневниот фестивал ќе може да се купи и „мерч“ од сите бендови кои ќе настапат, а и од другите бендови што се дел од колективот „Гола Планина“.

На првото издание на „Сепак се врти“ ќе настапат АТА, „Црно Собрание“, „Conspiracy“, „Ендемски Вид“, Јоана Ристеска, „Кокиче“, „Кенопсија“, КЕМ, „Lost in Reverie“, Огнен Златанов, „Peach Vice“ и „Vagina Corporation“.