Новак Ѓоковиќ го заврши настапот на турнирот во Индијан Велс по поразот од Џек Дрејпер во осминафиналето со 1-2 во сетови (6-4, 4-6, 6-7).

Српскиот тенисер и покрај тоа што има 38 години не се предаваше и во тешките моменти, а посебно драматичен беше третиот сет кога прво се најде во негатива по загубен брејк, но успеа да се врати во мечот токму кога Дрејпер сервираше за победа. Возбудувањата продолжија и во тај-брејкот, каде британскиот тенисер поведе со 3-1.

Сепак, и српскиот ас имаше реална можност да го сврти резултатот. Во решавачкиот тајбрејк водеше со 4-3 и имаше два сервиси во низа, но не успеа да ги искористи и му дозволи на противникот повторно да ја преземе контролата.

По два часа и 37 минути игра, Дрејпер дојде до победата и обезбеди пласман во следната рунда, каде што ќе се соочи со Данил Медведев. Meсто во следната рунда без поголеми проблеми исто така обезбеди и Карлос Алкараз кој беше подобар од Каспер Руд со 6-1 и 7-6.

Инаку, Ѓоковиќ во својата кариера пет пати го освојуваше престижниот турнир во калифорниската пустина, но од 2016 година наваму само еднаш, во 2017 успеа да стигне подалеку од четвртото коло.