Советот на јавните обвинители ја определи Наташа Крстевска Цалева за вршител на должноста Виш јавен обвинител на Вишо јавно обвинителство Скопје, до изборот на нов шеф на ова обвинителство, не подолго од шест месеци.

Именувањето на Крстевска Цалева на функцијата била единствена точка на дневен ред на денешната 33-та седница на Советот на јавни обвинители.

Советот на јавни обвинители на почетокот на неделава ја прифати оставката на Мустафа Хајрулахи, кој досега го водеше Вишото јавно обвинителство Скопје.

Хајрулахи беше суспендиран откако Основното јавно обвинителство Штип поднесе обвинителен акт за пет кривични дела „малтретирање во вршење на службата“ и едно за „злоупотреба на службената положба и овластување“. Тој категорично ги отфрли сите обвинувања, тврдејќи дека случајот е тенденциозен и политички монтиран со цел негово отстранување, поврзувајќи ја постапката со неговото постапување во врска со „бонусите на СЈО“.

Советот на јавни обвинители во февруари годинава ја определи обвинителката Наташа Крстевска Цалева да функцијата шефица на Вишото јавно обвинителство, додека трае оддалечувањето на вишиот јавен обвинител Мустафа Хајрулахи.