Напаѓачот на гардистите во Вашингтон се соочува со обвинение за убиство
Рахманула Лаканвал, осомничен за пукање во двајца припадници на Националната гарда во Вашингтон сега се соочува со обвинение за убиство од прв степен, откако една од жртвите, 20-годишната Сара Бекстром, им подлегна на повредите. Другиот војник, 24-годишниот Ендру Волф, останува во критична состојба по инцидентот во среда попладне, објави Скај њуз.
Препорачано
Канцеларијата на американската обвинителка Џанин Пиро потврди дека 29-годишниот Лаканвал се соочува со обвиненија за убиство од прв степен, поседување огнено оружје при извршување на насилно кривично дело и напад со намера за убиство.
Пиро најави дека ќе бидат поднесени „повеќе обвиненија“ и објасни дека Лаканвал патувал низ целата земја за да изврши „напад од заседа“ со револвер.
Според официјални извори, Лаканвал дошол во САД во 2021 година преку програмата „Операција Добредојдовте кај сојузниците“, со која беа евакуирани илјадници Авганистанци по повлекувањето на американските сили. Пред да емигрира, тој служел во единица на авганистанската армија поддржана од ЦИА.
