Наоми Кемпбел за зависноста од дрога: Траумите и тагата од детството ме турнаа кон порокот
Британскиот модел Наоми Кемпбел во новиот документарен филм „The Super Models“ откри дека зависноста од дрога во деведесеттите „речиси ја убила“.
Кембел тогаш беше на врвот на својата манекенска кариера. Таа призна дека се свртела кон кокаинот за да заборави на траумата од детството и да се помири со смртта на италијанскиот дизајнер и близок пријател Џани Версаче.
„Една од работите што се обидував да ја сокријам беше тагата. Зависноста е таква. Тоа е опасна работа, навистина е. Мислите дека ќе ја залечи раната, но нема. Тоа може да предизвика многу страв и вознемиреност“, изјави легендарниот модел.
„Џани ме мотивираше да излезам и да продолжам понатаму кога не мислев дека можам. Кога умре, мојата тага стана преголема“, додала таа.
Пет години се борела со зависноста, а во 1999 година колабирала за време на снимање. Тогаш, вели таа, сфатила дека мора да се пријави за рехабилитација.
„Тоа беше една од најдобрите работи што можев да ги направам за себе во тоа време. Беше страшно да се погледнам во огледало. Не можете да ги скриете чувствата. Јас се убивав. Беше многу болно“, заклучила Кемпбел.
Кемпбел тврди дека главната причина поради која почнала да зема супстанци била траума од детството. Имено, познатата манекенка пораснала без нејзиниот татко кој ја напуштил нејзината мајка додека таа била бремена.
„Многу работи потекнуваат од моето детство, многу прашања… Да речеме – кога не го познаваш татко ти или не ја гледаш мајка ти. Тоа носи многу различни чувства. Едно од тие чувства е бесот. Тоа е манифестација на подлабоки проблеми. Мислам дека се заснова на несигурност, ниска самодоверба и осаменост“, објасни таа.
Патем, „The Super Models“ е нов документарен филм на „Епл Ти-ви“ за успешните кариери на моделите Наоми Кемпбел, Синди Крафорд, Линда Евангелиста и Кристи Тарлингтон.