Најтрофејниот македонски кошаркарски клуб, Работнички, најавува нов почеток и амбициозен проект во која за нов извршен директор беше назначен Бранко Радевски кој доаѓа на местото на Горан Веселиновски.

Радевски е добро познато име во македонскиот спорт. Во минатото успешно ја извршуваше директорската функција во фудбалските клубови Вардар и Работнички, а во последните години беше директор на младинската академија на КК Работнички.

Од клубот најавуваат сериозни промени и долгорочен план за стабилизација. Во фокусот ќе бидат целосно финансиско консолидирање, подмирување на обврските, подобра организација и создавање тим кој ќе може рамноправно да се бори со актуелниот шампион МЗТ Скопје за домашните трофеи.

Покрај изборот на нов извршен директор, направени се промени и во Одборот на директори. Покрај Радевски, во новиот состав членуваат Димитар Трајчевски, Миле Илиевски, Јорго Костов и Александар Стојкоски, со цел да се обезбеди поефикасно функционирање и организациска стабилност на клубот.