Најмалку 60 лица кои беа затворени по претседателските избори во Венецуела во 2024 година, чии резултати ги оспорува опозицијата, беа ослободени на Божиќ, соопшти  невладина организација во која членуваат активисти за човекови права и роднини на политички затвореници, пренесува Ал Џезира.

Сите ослободени беа уапсени во услови на политичка криза предизвикана од реизборот на Николас Мадуро за трет мандат во јули 2024 година. Опозицијата во тоа време ја осуди измамата.

Откако Мадуро беше прогласен за победник на изборите, беа организирани протести што доведоа до апсење на околу 2.400 лица, кои самиот претседател ги опиша како „терористи“. Оттогаш се ослободени повеќе од 2.000.

Околностите под кои 60-те лица беа ослободени остануваат нејасни. АФП не доби одговор од Министерството за правда.

Роднините изјавија дека ослободените лица издржувале казни во затворот со максимална безбедност во Токорон, во државата Арагва, на околу 134 километри од Каракас.