Три месеци од јавноста се крие договорот склучен помеѓу Македонија и „Бехтел и Енка“, за изградбата на коридорот 8 и 10-д. Договорот е причина за обвинувања помеѓу власта и опозицијата, а граѓаните можат да веруваат само на збор оти документите се чуваат во фиока. Оправдувањето на Владата е дека во него имало клаузула за тајност. Професорката по право, Мирјана Најчевска, смета дека криењето на договорот значи дека во него има некаква измама.

„Сите граѓани имаат право да го видат договорот со кој се градат патишта. Секое криење на ваков договор значи дека во него е содржана таква измама која е премногу очигледна за секого. Договорите се склучуваат врз основа на постоечки закони а не се менуваат закони врз основа на склучени договори“, стои во објавата на Фејсбук на професорката Најчевска.

Во исто време, лидерот на ВМРО-ДПМНЕ, Христијан Мицкоски посочи дека Владата презела обврски кон „Бехтел и Енка“ од стотици милиони евра, а се’ уште шајка не е закована.

СДСМ пак, денес соопшти дека  се прави хајка насочена кон „Бехтел и Енка“, од страна на опозицијата.