Наградената поема „Денес“ на Славе Ѓорѓо Димоски има доследно осмислено и кохерентно поетско пеење
Наградата „Григор Прличев“ за најдобра поема за 2023 година ја доби поетот Славе Ѓорѓо Димоски за поетското дело со наслов „Денес“, а повелбата му беше врачена на 5 февруари на свеченост во НУ Центар за култура „Григор Прличев“ во Охрид.
Поетската манифестација „Прличеви беседи“ се одржува во чест на ликот и делото на великиот поет и преродбеник Григор Прличев. Традиционалното чествување и годинава се одржа на неколку локации во Охрид, а наградата „Григор Прличев“ на годинашниот лауреат Славе Ѓорѓо Димоски му беше врачена на свеченост во НУ Центар за култура „Григор Прличев“ во Охрид.
– Наградата што го носи името на Григор Прличев е за мене исклучително значајна, бидејќи моето литературно зреење е врзано за Прличев. Уште како ученик од четврто, петто одделение ја прочитав неговата „Автобиографија“ и оттогаш сум цврсто врзан за и со Прличев. Темата „Прличев“ ја имам обработувано и во неколку песни од постарите книги, а сум направил превод и адаптација на двете автобиографски дела, „Автобиографија“ и „Мечта на еден старец“ од нивните првообјави. Но, задоволството да биде уште поголемо го наведувам и фактот дека не врзува исто поднебје во кое сме родени, растени и книжевно издигнувани – охридското, кое својата фасцинација ја прелева во различни нијанси на духовен восхит. Со воспоставување награда со името „Григор Прличев“, се оддава висока почит на најталентираниот, но и најтрагичен лик во македонската литература, чиј талент мислам не е достигнат до денес – истакнува поетот Славе Ѓорѓо Димоски.
Наградената поема „Денес“ ја обработува денешната ситуација, сето она што се случува кај нас, во нашата земја и надвор. Тоа е поема во која се трага по личен, човечки, државен идентитет… Дејството во самата поема е ставено во временска рамка од шест месеци и се случува во 2022 година.
– Поемата „Денес“ уште на стартот се издвои по својот урбан, современ пристап и тематика, како концепциски доследно осмислено и кохерентно поставено пеење. Поемата нуди своевиден пресек на актуелните состојби во светот, со приемчиво обликувана експресија, на места и со признаци на духовит квалитет, што е прилично редок и неочекуван во науката. Поемата остварува драгоцени проникнувања и созвучја со современоста, дискретно актуализирајќи повеќе топоси, како постхуманизмот, миграциите, епидемиите и тековните војни на екраните. Композициски поемата содржи три дела секој составен од три пеења, проникнати со фино дозирани наративни секвенци и јасна нишка на приказната. Поемата „Денес“ заедно со сите досега наградени поеми рамносилно се вградува во одржувањето на Прличевиот дух во нашата современа поетска продукција, сега и во иднина – стои во образложението за наградата.
Одлуката за доделување на наградата „Григор Прличев“ за најдобра поема за 2023 година едногласно ја донесе комисија во состав Милован Стефановски – претседател и Елизабета Шелева и Иван Додовски – членови.
Од вкупно седум ракописи, кои беа анонимно пријавени на конкурсот, комисијата ги издвои во потесен круг поемите: „Денес“ (пријавена под шифра „Сенед“), „Одблесок“ (пријавена под шифра „Еригон“) и „Армагедон – големиот суден ден“ (пријавена под шифра „Валтер“).
(Текстот е објавен во „Културен печат“ број 217, во печатеното издание на весникот „Слободен печат“ на 10-11.02.2024)