Во Големата сала на Центарот за култура „Антон Панов“ во Струмица, на 4 јуни, со почеток во 20 часот, ќе се одржи концерт на Националниот џез-оркестар, со кој ќе биде отворено првото издание на „Џез стрим фестивал“ (Jazz STReam Festival).

Ова ќе биде прво гостување на Националниот џез-оркестар во Струмица и почеток на „Џез стрим фестивал“ – нов фестивал што ќе донесе квалитетна џез-програма и свежа музичка енергија во градот.

Публиката ќе има можност да ужива во моќниот звук на биг-бенд оркестарот во живо со програма што ги спојува традицијата на џезот и современиот музички израз под диригентство на маестро Џијан Емин.

Програмата на првото издание на „Џез стрим фестивал“ ќе се реализира од 4 до 7 јуни и носи свежа енергија, врвни музичари и современ џез-звук на сцената во Струмица. Планирани се концерти, промоции на книга и албум, џез-сесии.

На 5 јуни во камерната сала на Центарот за култура „Антон Панов“ ќе настапат Гоце Стевковски квинтет и Тони Китановски трио, на 6 јуни ќе се одржат концертите на Алиќ, Гошиќ, Ангелов и Јаневски квартет и на групата „Трансверз“, додека на 7 јуни на фестивалот ќе настапат „Летечки пекинезери“ и „Хот џез оркестра“ придружени со Пијан Славеј.