На четвртата годишнина од војната во Украина, синоќа на плоштадот на Републиката во Белград се одржа антивоен протест организиран од Руси и Украинци кои живеат во Србија и се против војната. На собирот се појавија и членови на крајно десничарската организација „Народни патроли“, која ја поддржува руската инвазија, пренесе Н1.

Учесниците на антивоениот протест, на кој учествуваа Украинци, Руси, Белоруси и Срби, се собраа пред Националниот театар носејќи украински знамиња. Главните пораки на собирот беа „Не на војната во Украина“ и „Русија без Путин“, а толпата скандираше „НЕ на војната“.

Во исто време, на плоштадот имаше и членови на „Народни патроли“, кои беа од другата страна на полицискиот кордон и извикуваа проруски слогани и носеа руски знамиња со воената ознака „Z“.

Два полициски кордони во опрема за немири ги разделија двете групи. Полицијата го легитимираше водачот на „Народни патроли“.

За време на собирот, како што пренесуваат српските медиуми, имало вербални конфликти, каде што учесниците на антивоениот протест им викале на членовите на десничарската група дека се „фашисти“.