Двајцата гевгеличани кои се загубија попладнево при планинска прошетка на Кожув се пронајдени и се наоѓаат во добра состојба, информираат членови на нивните семејства. Откако паднал мрак, тие ја загубиле рутата по која се движеле, но, за среќа, биле лоцирани по неколкучасовната потрага во која учествуваа припадници на полицијата, на шумската полиција и ловџии кои добро ја познаваат и месноста Круша и планината Кожув.

На Кожув попладнево се загубија двајца гевгеличани на возраст од околу 70 години. Алармот за нив го вклучил синот на еден од нив кој пријавил во полиција, откако при последниот контакт околу 17 часот му рекол дека заедно со пријатело се загубени во месноста Круша.

Од тој момент, телефонот на неговиот татко бил недостапен за што се претпоставуваше со две причини – празна батерија или лоша мрежна покриеност на подрачјето. Меѓутоа, за среќа, спасувачката потрага по двајцата гевгеличани заврши успешно.