МВР го пронајде момчето кое насилно шутираше куче во Куманово, следува пријава
Станува збор за малолетно момче од општина Старо Негоричане, кое денеска било повикано на разговор во полициска станица. На прашањето дали и соучесникот бил повикан, бидејќи на видеото се слуша како снимателот со иронични коментари и смеа продолжува снима како ништо погрешно не се случило, од МВР велат дека засега само момчето кое го шутираше кучето е сторителот, но дека постапката е во тек.
„Малолетното момче е од село Стрезовце, а по целосно документирање на случајот, ќе биде поднесена соодветна пријава против него“, велат од МВР за „Слободен печат“.
Според Кривичниот законик, на сторителот му се заканува парична или затворска казна:
Мачење животни, Член 233: „Тој што грубо злоупотребува животно или го изложува на непотребни
маки или му нанесува непотребни болки или заради изживување го изложува
на страдање, ќе се казни со парична казна или со затвор до една година.“
Двете момчиња првично го објавиле видеото на нивните фејсбук-профили, но откако видеото стана вирално, набрзо ги избришаа. Граѓани на Куманово ги препознаа момчињата и веднаш ги идентификуваа, при што до МВР пристигнале 3 електронски пријави.
„Слободен печат“ прв го објави видеото на еден од нашите инстаграм-профили, а видеото имаше над 24,000 илјади прегледи за помалку од осум часа, но поради присутноста на насилство беше отстрането од самата социјална мрежа. Видеото инстантно собра многу негативни реакции и над 400 коментари, а следбениците веднаш побараа најстрога казна за нехуманото дело на момчето.
