Четири млади актерки засукаа ракави и мошне решително истапија на музичката сцена. На 13 април (четврток), со почеток во 21 часот, на сцената во „Јавна соба“ (Public Room), ќе се одржи „Girls Night“, која ќе понуди незаборавна забава за сите љубители на добра музика и добар перформанс.

Актерките Нина Елзесер, Ангела Стојановска, Надица Петрова и Бонита Стеви ќе организираат невиден диско-перформанс, кој е фузија на мјузикл, стенд-ап комедија и караоке.

Младите актерки имаат направено досега невиден спој на театарска глума и музичко-сценски настап преместувајќи го вешто тежиштето на забавата од театарски кон музичко-забавен перформанс.

При осмислување на проектот актерките си го поставиле прашањето: „Како девојки родени во 90-те би ја внеле скопската публика во диско-ерата на 70-те и 80-те?“ Актерките со своите извонредни перформанси успејаа многу вешто да ја осмислат целата двочасовна програма со цел публиката дома да си заминe срeќна, весела и со желба за повторно видување. Стилист на целиот проект е Сашка Павловска, а продукцијата е на „Јавна соба“.