Бони Тајлер е ставена во вештачка кома за полесно закрепнување по итна операција на цревата, соопшти портпаролот на пејачката. Имено, 74-годишната музичка ѕвезда, родена во Велс, во средата била итно пренесена во болница во близина на нејзиниот дом во Фаро, Португалија, каде што била оперирана, пренесува „Би-би-си“.

„Бони е ставена во индуцирана кома од страна на лекарите за да ѝ се олесни закрепнувањето“, изјавил нејзиниот портпарол.

Тој додаде дека семејството бара приватност во овие тешки моменти и најавил дека дополнителни информации ќе бидат објавени кога ќе има нов развој на состојбата.

Пејачката, чие вистинско име е Гејнор Хопкинс, светска слава стекна во 1983 година со хитот „Total Eclipse of the Heart“, песна што и денес важи за една од најпрепознатливите балади во поп-рок музиката.

Нејзината кариера започнала во 1977 година со песната „Lost in France“, а подоцна следуваа и хитови како „Holding Out for a Hero“.

Бони Тајлер ја претставуваше Велика Британија и на Изборот за песна на Евровизија во 2013 година, а во 2023 година доби и титула MBE за придонес во музиката.