Основачот на инвестициската компанија „Турмалин Партнерс“ Ике Гроф, на 5 февруари 2019 година примил мејл во кој се споменува Македонија, а кој сега е дел од досието Џефри Епстин.

Мејлот на ниеден начин не е поврзан со скандалот со покојниот сексуален престапник Епстин и претставува новинарско истражување на „Блумберг Бизнисвик“ од новинарите Синтија Кунс и Роберт Лагрет.

Текстот е со наслов „Лекот стар 50 години кој би можел да ја реши американската криза со самоубиствата“(се мисли на кетамин). Во текстот се наведува дека во рамки на долгогодишно научно истражување за самоубиствата, американски научници (поврзани со Универзитетот Колумбија) имаат создадено банка од човечки мозоци за истражување.

Во таа колекција има околу 1.000 мозоци (од лица што извршиле самоубиство и контролни примероци).

Македонија е спомната како една од земјите што придонела со примероци, преку соработка со научници од Универзитетот Колумбија. Во текстот стои дека мозоците од Македонија биле отстранети по смрт, биле веднаш замрзнати, транспортирани во САД за научни цели и правилно означени и архивирани. Целата новинарска сторија може да ја прочитате во продолжение и таа е јавно достапна на страницата на американското Министерство за правда.