Моден могул со години силувал млади мажи: ФБИ го истражува случајот
Американското Федерално истражно биро (ФБИ) започна истрага против поранешниот директор на модниот бренд „Аберкромби и Фич“ (Abercrombie & Fitch – A&F), Мајк Џефрис, за наводно сексуално искористување и злоупотреба на млади мажи на настани што ги организирал низ светот, пишува „Би-би-си“.
Мајк Џефрис и неговиот партнер Метју Смит, исто така, се соочуваат со граѓанска тужба поради наводите дека воделе операција за трговија со луѓе.
Агентите на ФБИ интервјуираат и повикуваат потенцијални сведоци, а истрагата ја водат оперативци за сексуален криминал и федерални обвинители од Источниот округ на Њујорк.
Во октомври, документарен филм и серија на поткаст на „Би-би-си“ откри дека осум млади мажи наводно присуствувале на овие настани помеѓу 2009 и 2015 година во Лондон, Париз и Маракеш.
Мажите тврдат дека Џефрис и Смит имале сексуални односи пред нив или ги „насочувале“ еден кон друг во сексуалните активности.
Документите откриени од „Би-би-си“, вклучително и авионски билети и планови за настани, откриваат дека имало високо организирана операција во која била вклучена мрежа на регрутери, како и посредникот Џејмс Џејкобсон.
„Аберкромби и Фич“ за „Би-би-си“ изјавиле дека компанијата е „шокирана и згрозена“ од наводното однесување на Мајк Џефрис и дека поради тие наводи му е укината дел од пензијата. Наводниот регрутер, Џејкобсон, ја негирал одговорноста, додека Џефрис одбил да ги коментира наводите.