НВО: Многу препораки на УНЕСКО не се спроведуваат, а Владата за Охридскиот Регион испратила „копи-пејст“-извештај
Од 19-те главни препораки на УНЕСКО, само четири се спроведувани и тоа само делумно, реагираат невладините организации.
Извештајот на Министерството за култура кој е испратен до УНЕСКО за природното и културното наследство во Охридскиот регион, воопшто не кореспондира со состојбата на терен, реагираа организациите од Охрид, Струга и Поградец. Додаваат дека со извештајот само се прикриваат проблемите и, како што велат, „се става ѓубрето под тепих“.
„Извештајот е обичен копи-пејст, направен и поднесен до УНЕСКО. Многу аспекти од овој извештај не се точни и не кореспондираат со реалната ситуација. Неконтролираната урбанизација е спомната со четири реченици, иако е голем проблем во Националниот парк Галичица, а некојси црвен елен се појавува на половина страна. Значи, урбанизацијата е занемарена. Има и точни работи кои се спомнати, но има и големи пропусти, со цел да се оддалечи вниманието на јавноста од овие проблеми“, вели Никола Киселинов од туристичката асоцијација „Билјана“ од Охрид.
Претставниците на невладините организаци велат дека не е прв пат да се презентира ваков извештај и главниот проблем е во тоа што државата нема комуникација со невладиниот сектор, иако тоа е предвидено според препораките на УНЕСКО
„Со ваквата хаотична состојба во урбанизацијата страда туризмот во Струга и Охрид. Голем проблем се и заштитата на Охридското Езеро и човечкото влијание врз екосистемот. Ние формиравме Стратегија за комуникација, која е препорака од УНЕСКО, но интересот на Владата и другите институции не е каков што треба да биде“, рече Ндерим Положани од невладината Капс Струга.