Обединетото Кралство постигна договор со Брисел за повторно приклучување кон европската програма за размена на универзитети Еразмус од 2027 година, од која излезе во 2020 година како дел од Брегзит, објавија заеднички британската влада и Европската Унија, објави Гардијан.

„Приклучувањето кон Еразмус+ е голема победа за нашите млади луѓе со отстранување на бариерите и проширување на хоризонтите, така што секој, без оглед на неговото потекло, има можност да студира и да се обучува во странство“, изјави британскиот министер за односи со Европската Унија, Ник Томас-Симондс.

Договорот меѓу Лондон и Брисел е дел од обновувањето на односите на Обединетото Кралство со Европската Унија, што лабуристичката влада на Кир Стармер се обидува да го направи откако ја презеде власта во јули 2024 година, по години тензии меѓу 27-те и претходните конзервативни влади, кои се одговорни за иницијативата и управувањето со процесот на Брегзит.