НУ Центар за култура – Битола и Здружението за култура и уметност „Движечки музички театар“ – Битола ја најавија премиерата на претставата „Медеја МК“, создадена според „Medeamaterial“ на Хајнер Милер, поезија на Ана Бунтевска и песни на Марјан Нечак.

„Медеја МК“ е авторски проект што низ спојот на театарот, музиката, поезијата и аудио-визуелните елементи отвора нов поглед кон една од најмоќните женски фигури во светската митологија. Претставата го истражува просторот помеѓу љубовта, предавството, болката и отпорот, поставувајќи ги вечните прашања на современото време.

Во претставата игра актерката Валентина Грамосли, додека адаптацијата, режијата, аудиоинсталацијата и музиката се на Марјан Нечак. Премиерата на претставата ќе се одржи на 21 јуни (недела), во 20 часот, на Голема сцена при НУ Центар за култура – Битола.

Во авторскиот тим на проектот се и преведувачките на текстот Наташа Аврамовска и Елена Китановска – Ристовска, сценографијата е на Марјан Нечак и Сергеј Светозарев, додека видеопроекциите ги подготви Сергеј Светозарев.

Инспициент е Александар Црвенко, тон-мајстор е Тони Тошевски, видеооператор е Владимир Пераловски, дизајнот на светло е на Никола Ѓеорѓиевски, а дизајнот на плакатот е на Сашо Илковски.