Министерство за култура: Грчко-македонска соработка во областа на конзервацијата и реставрацијата
Во работна посета на Република Северна Македонија од 1 до 4 април престојуваат Флора Карагијани од Европскиот центар за византиски и поствизантиски споменици и Марија Мерцани, раководител на Дирекцијата за конзервација на антички и современи споменици од Република Грција.
Гостите од Грција се сретнаа со министерката Ирена Стефоска и на средбата, меѓу другото, било иницирано потпишување меморандум за соработка со Европскиот центар за византиски и поствизантиски споменици. На средбата била потврдена отвореноста за конкретна соработка помеѓу двете пријателски земји со особен фокус на конзервација и реставрација на византиското наследство, обука на стручни кадри за заштита, како и академска соработка и изработка на трудови.
Делегацијата од Република Грција ги посети и Археолошкиот музеј, Заводот за заштита на спомениците на културата во Битола, црквата „Св. Ѓорѓи“ во Курбиново, како и црквата „Св. Софија“ во Охрид.
(Текстот е објавен во „Културен печат“ број 75, во печатеното издание на „Слободен печат“ на 3-4 април 2021)