Министерката за култура нема да предложи разрешување на Азири кој „ќе крши раце и нозе на антиалбанци“

Бисера Костадиновска Стојчевска - министерка за култура / Фото: ,,Слободен печат'' - Драган Митрески

Министерката за култура Бисера Костадиновска Стојчевски ќе почека дали надлежните органи ќе утврдат вина кај државниот секретар за култура Валмир Азири и потоа ќе одлучи дали ќе му предложи на премиерот Димитар Ковачевски тој да биде разрешен. Ова е одговорот на министерката на прашање на пратеникот од ВМРО-ДПМНЕ Антонијо Милошоски дали ќе предложи разрешување на Азири кој по инцидентот во Комисијата за европски прашања на Фејсбук го поддржа дивеењето на сопартиецот Арбер Адеми и му се закани на Милошоски дека на сите како него „антиалбанци“ ќе им ги скршат рацете и нозете.

-Бидејќи секој член на Влада има право да предложи на претседателот на Владата да именува државен секретар, дали би било упатно да предложите разрешување на Валмир Азири за употреба на недоличен речник во кој се промовира говор на омраза – праша пратеникот Милошоски.

Министерката Костадиновска Стојчевска рече дека пред да му одговори на прашањето сака да каже дека осудува насилство но и дека не го оправдува насилството упатено на собраниските комисии кон пратеничките од СДСМ и од ДУИ Снежана Калевска Ванчева и Арта Биљали Зендели. Таа додаде дека како поранешна пратеничка била сведок на се што правеле ВМРО-ДПМНЕ во Собранието.

-Вие самиот поднесовте пријава и ако се утврди кривично дело ќе донесам соодветно решение, но имам прашање до вас – рече министерката.

На ова реагираше потпретседателот на Собранието Горан Мисовски кој и укажа на министерката дека на седницата за пратенички прашања министрите одговараат, а не поставуваат прашања.

Милошоски се заблагодари на Мисовски за реакцијата и додаде дека не е задоволен од одговорот на министерката.

-Кога државен секретар без разлика што мислел, во Министерство за култура каде очекуваме луѓето да бидат за нијанса поплеменити, тој јавно пишува и повикува на кршење на рацете и на нозете на сите кои не размислуваат како него, тогаш Министерството губи на репутација. Ако предложите разрешување вие ќе добиете на репутација. Ако заштитите човек кој поттикнува насилство Министерството и Владата губи на репутација и наместо да се превенира говор на омраза и насилство тој станува пасивен соучесник. Овој човек со своето поведение нема да ви помогне во ширењето на културата – констатира Милошоски.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот