Екипата од „Автокоманда“ ја темпира формата пред натпреварите од првото квалификациско коло во Лига Европа. Денеска во последниот контролен меч составот Металург го совлада Пролет со резултат 36:30 (10:7, 21:14, 29:25). Се играше 75 минути (3х20 + 15 минути), во победничките редови најефикасен стрелец беше Шилегов со девет голови.

Играчите на тренерот Зоран Кастратовиќ одличнаа го почнаа дуелот и веќе во шестата минута стекнаа предност од 6:2. Пролет успеа да се врати и во 11 минута дојде до израмнување на 6:6. Следеа неколку минути на израмнета игра, пред Металург повторно да направи серија и првиот дел да го заврши во своја корист 10:7.

Во второто продолжение „сино-белите“ уште повеќе ја зголемија позитивата, имаат „плус девет“ (20:11) во 36. минута, а овој период го добија со 21:14. Во третото продолжение Металург имаше постојана предност од шест-осум гола, иако при крајот на овој период имаше лоша реализација и ракометарите Пролет се доближија на само „минус два“, 27:25.

По 60 минути игра, Металург водеше со 29:25, а во последните 15 минути на својата предност додаде уште два погодоци за конечни 36:30.

Првиот дуел против хрватската Спачва во првото квалификациско коло на Лига Европа, Металург ќе го има на 29 август (19.00 часот) во салата „Автокоманда“, а реваншот е на 5 септември (19.30 часот).