Италијанската влада е подготвена да продолжи со оспорениот план за задржување на барателите на азил во центрите за притвор во Албанија, изјави италијанската премиерка Џорџија Мелони.

Мелони склучи договор со Тирана минатата година да пренасочи во балканската земја дел од мигрантите кои Италија ги собра на море, велејќи дека шемата ќе дејствува како пречка против заминувањата од Африка, пренесува Ројтерс.

Сепак, водечкиот план наиде на судско противење во последниве месеци. Судиите покренаа сомнеж за неговата усогласеност со правото на ЕУ и донесоа одлука дека првите две групи мигранти во центрите мора да бидат префрлени во Италија, оставајќи ги објектите празни.

Мелони рече дека Судот на правдата на ЕУ ќе започне со разгледување на случајот во февруари, додавајќи дека мнозинството земји-членки на ЕУ се согласиле со Рим за албанските кампови.