Познатиот американски тениски ас Џон Мекинро во интервјуто за „Тајмс“ откри дека од „големата тројка“ него најмногу го потсетува Новак Ѓоковиќ.

– Федерер е модерната верзија на Род Лејвер. Никогаш не сум видел некој да работи понапорно од Џими Конорс, но Надал го надмина во таа смисла. А Ѓоковиќ е како човечка „мета“ за пикадо, тоа некако важи и за мене – вели Мекинро.

Мекинро неодамна, во друго интервју, ја пофали менталната сила на Ѓоковиќ.

– Тој е ментално најсилниот играч. Надал е некој кој работи најтешко. Мислам дека Ѓоковиќ не ја добива почитта што ја заслужува, тој е класа – се зборовите на Мекинро.

Ѓоковиќ, Федерер и Надал заедно освоија вкупно 63 грен слем титули, а Мекинро вели дека нивното огромно ривалство придонесе за тоа. Воедно жали што во негово време немал повеќе мечеви со некои други играчи како Бјерн Борг кој предвреме се повлече од професионалните води.

– Дефинитивно ќе беше подобро за мене и за мојата игра. Остана голема дупка. Новак и Надал играа 59 пати, што е огромна бројка. Јас и Борг игравме само 14 пати. Голема штета – рече Мекинро.

Иванишевиќ: Ѓоковиќ ќе игра уште пет години, сака 30 грен слем титули