Потпретседателот на Алијансата за Албанците, Ремзи Мехмеди, во изјава за „Слободен печат“ вели дека неговата партија е за осум изборни единици.

-Ние продолжуваме да бидеме доследни на нашиот став и предлагаме осум изборни единици затоа што преку организација на пропорционални избори со осум изборни единици и отворени листи ја постигнуваме најправедната и најдемократска политичка застапеност која одговара на Република Северна Македонија од сите аспекти: регионален, демографски, етнички – вели Мехмеди.

Тој додава дека Алијансата за Албанците е најгласниот и најупорниот политички субјект за изменување и дополнување на Изборниот законик, што би предвидувало организирање на пропорционални избори со отворени листи.

– Сметаме дека преку оваа промена се движиме кон демократизација на општеството и уште поадекватна и квалитативна застапеност во Законодавниот дом – додава Мехмеди.