Мавровскиот меморијал се одржа во Словенија, трето место за Ставре Јада
На 7 и 8 март се организираше новото 60 издание на најстариот нордиски куп на Балканот, Мавровски меморијал. Оваа година, поради неповолните снежни услови во Маврово, домаќин на трките беше ски-центарот Покљука, Словенија.
Македонските претставници имаа одлични настапи и забележаа солидни резултати во силна конкуренција на скијачи од целиот регион.
Првиот ден од натпреварите, во женска категорија, најдобра беше Ана Цветановска која го освои 11 место со задоцнување од 1 минута и 43 секунди. Од мажите, најбрз беше Ставре Јада кој со задоцнување од 1 минута и 45 секунди успеа да се најде на 11 позиција.
На вториот ден од меморијалот, на трката од 7,5км, Цветановска се пласираше на осмото место со задоцнување од 3 минути и 53 секунди, додека пак, Јада со задоцнување од 1 минута успеа да го обезбеди одличното трето место.
На трките учество зазедоа и Матеја Трајковска, Давид Торевски, Дарко Дамјановски, Виктор Чакаровски, Адриен Боирал, Олгица Кованчалиев, Кирјана Димитровска и Лука Георгиевски.