Првата македонска судијка во Европскиот суд за човекови права во Стразбур, Маргарита Цаца Николовска смета дека судењето за пожарот во дискотеката „Пулс“, ќе биде тест што ќе трае долго време и нема брзо да се заврши.

– Да почекаме и да веруваме, а јас се надевам дека и сите ќе сакаат колку е можно оваа трагедија на еден најтранспарентен начин да се расчисти. Ако ништо друго барем за родителите кои ги изгубија своите најмили. Тоа секако не е утеха, но ќе покажеме дека државата сака нешто да направи, иако има многу грешки, за да овозможи тие емоции да стивнат – изјави Николовска во 24 анализа.

Никој не знае колку ќе трае овој процес – ќе направиме сè да тече непречено, рече судијката Илиевска

Таа смета дека државата преку судството се обидува да ја донесе правдата таму каде што треба.

– Обвинителството решило да тргне со собирање на сите личности во еден предмет. Како тоа ќе се изведува, треба да видиме – порача таа.

Во судницата во Идризово утрово започна едно од најголемите судења за пожарот во дискотеката „Пулс“ во Кочани, кога на 16 март годинава загинаа 63 луѓе, меѓу кои и деца, а околу 200 беа повредени.

Случајот опфаќа 38 обвинети – 35 физички и три правни лица кои се товарат за тешки дела против општата сигурност. Меѓу нив има сопственици на локали, управители, инспектори, поранешни градоначалници, членови на обезбедување и државни службеници.

Правдата за Кочани е нужна заради спас на вербата во државата