Ракометарот на Еурофарм Пелистер, Дејан Манасков, кој оваа сезона игра во одлична форма, одлучи да не се врати во дресот на македонската репрезентација, иако селекторот Кире Лазаров го вклучи на списокот за претстојните натпревари.

Манасков преку кратко соопштение се огласи до јавноста и објасни дека поради нарушениот однос со Лазаров нема да се врати во репрезентацијата.

„Би сакал да ја информирам целата македонска јавност и сите медиуми дека во моментов, за доброто на националниот тим, нема да настапувам за македонската ракометна репрезентација. Ќе бидам искрен и краток во моето обраќање и објаснување на одлуката.

Во изминатите единаесет години колку што настапував за македонската селекција, секогаш со чест и гордост го носев светиот дрес. Се борев и настапував секогаш со цело срце.

Моите односи со селекторот Кирил Лазаров се нарушени и не гледам простор во моментов истите да се подобрат. Последните две години неправедно бев неповикуван. После се што дадов, чувствувам дека Македонија премногу лесно се откажа од мене. Тоа премногу ме погоди и после долго размислување ја донесов оваа одлука.

Им посакувам многу среќа и успех на репрезентативците во следниов период. Дотогаш ќе бидам ваш најголем навивач и поддржувач.

До некое следно видување Македонијо“, напиша Манасков.

Преземено од: Спорт.ком.мк