Во Културно-информативниот центар во Скопје од 21 ноември е поставена изложбата „Мал формат / Миниартура“ на Друштвото на ликовни уметници на Македонија. На изложбата се претставени дела во дводимензионален и тридимензионален формат – цртежи, слики, колажи, скулптури, објекти, графики и дела во други техники од членовите на уметничката асоцијација.

Малиот формат и минијатурата се чести модели на запишување фази од процесот на реализација на ликовните дела и со тоа се дел од тековната продукција на ликовните уметници. Во тој процес и продукцијата на финални ликовни дела во помал формат е од особено значење, бидејќи дава посебно место на јасната идеја, прецизноста во реализацијата на делата и актуелност на понудениот концепт.

Изложбата се организира веќе 41 година како соработка помеѓу Културно-информативен центар – Скопје и ДЛУМ, а оваа година наградата „Вангел Коџоман“ му е доделена на уметникот Никола Пијанманов за мал формат, додека наградата „Константин Мазев Коце“ ја доби уметницата Јана Јакимовска за мал формат.

Уметничкиот Совет на ДЛУМ оваа година ги награди авторите Мице Јанкуловски за „Мал формат“ и Росица Лазеска за „Миниартура“.

Проектот за реализација на изложбата „Мал формат / Миниартура“ на ДЛУМ е поддржан од Министерството за култура и туризам. Изложбата ќе биде поставена до 28 ноември годинава.

(Текстот е објавен во „Културен печат“ број 257, во печатеното издание на весникот „Слободен печат“ на 23-24.11.2024)