Жесток дипломатски судир меѓу италијанската премиерка Џорџа Мелони и францускиот претседател Емануел Макрон изби денеска, а причината е убиството на активист од крајната десница во градот Лион минатиот викенд, објави „Политико“.

Луѓе блиски до Мелони остро му возвратија на Макрон откако францускиот претседател претходно ја нападна италијанската премиерка поради нејзината изјава дека убиството на 23-годишниот Квентин Деранк претставува „рана за цела Европа“.

Макрон, кој зборуваше за време на посетата на Индија, сугерираше дека Мелони неоправдано се меша во внатрешните работи на Франција.

Функционери блиски до италијанската премиерка рекоа дека коментарите на Макрон биле примени „со зачуденост“ и инсистираа дека изјавата на Мелони имала за цел „да покаже солидарност со францускиот народ погоден од овој страшен настан и на никаков начин да не се меша во внатрешните работи на Франција“.

Претходно истиот ден, Макрон изјави дека е „запрепастен од фактот што луѓето кои се националисти, кои не сакаат никој да им се меша дома, секогаш први коментираат за тоа што се случува во други земји“.

– Ако секој си ја гледа својата работа, работите би биле сосема во ред – рече Макрон.

На 14 февруари 2026 година, францускиот активист од крајната десница, Квентин Деранк, учествувал во тепачка во Лион меѓу неофашисти и крајно леви антифашисти. За време на судирот, тој се изолирал од групата и, откако паднал, бил претепан од повеќе антифашисти. Тој починал два дена подоцна од тешки повреди на мозокот. Многу од уапсените насилници биле поврзани со нелегалниот крајно лев милитантен антифашистички колектив „Непокорна Франција“.

Макрон изјави дека политичките екстреми во земјата мора „да си ги доведат во ред своите редови“ по убиството.

– Во Франција нема простор за движења што прифаќаат или легитимираат насилство – изјави Макрон за новинарите за време на посетата на Индија.

Двајцата лидери со години се судираат околу теми што се движат од миграцијата до абортусот, во контекст на долготрајни тензични односи, но се очекува да имаат момент на приближување во април на француско-италијанскиот самит во Тулуз.

Градоначалникот на Лион, Грегори Дусе, во четвртокот ги повика властите да ја забранат најавената прошетка во поддршка на загинатиот активист, закажана за сабота.