Милан Лазаревски три месеци ќе биде надвор од терените, официјално денеска соопшти ракометниот клуб Вардар 1961.

Лазаревски, кој воедно е член на најдобрата македонска репрезентација, по операцијата на рамото ќе го пропушти првиот дел од новата сезона.

Успешната операција на десното рамо беше извршена во Загреб, Хрватска, од страна на Никола Чичак.

Лазаревски имаше проблеми со рамото, и беше решено во најбрз рок да се изврши операција за потоа да биде подготвен за она што следува во првенството, известуваат од РК Вардар 1961.

Скопските „црвено-црни“ и со одигрување на контролни мечеви се подготвуваат за претстојната сезона. Во четвртокот на турнирот „Крсте Андоновски“ во Охрид загубија од Еурофарм Пелистер со 28:23, а претходно во првиот меч на турнирот славеа против Динамо Панчево од Србија со 29:27.