Властите на Палестина рано утрово ја објавија листата со имиња на околу 600 дополнителни странски државјани на кои ќе им биде дозволено да заминат во Египет преку граничниот премин Рафах. Според информацијата што ја објави „Њујорк Тајмс“, меѓу овие државјани има и Македонци.

Од македонското Министерство за надворешни работи велат дека во Газа има вкупно пет наши државјани и една палестинска државјанка, сопруга и мајка на две деца со македонско државјанство.

– Сите тие се на листата за напуштање на Газа. Исто така, покрај овие пет, на листата е и една палестинска државјанка (сопруга и мајка на две деца, кои имаат македонско државјанство), додаваат од МНР.

МНР: И македонските државјани во Газа наскоро ќе се евакуираат преку граничниот премин Рафах

Министерството вчера ја поздрави одлуката за одлуката за отворање на граничниот премин Рафах, со што се овозможува евакуација на странските државјани, вклучително и петте државјани на Република Северна Македонија.

– Нашите државјани кои се наоѓаат во Газа веќе се вклучени во списоците за евакуација и истото очекуваме наскоро да се реализира согласно околностите на терен и динамиката на евакуација, имајќи го предвид големиот број странски државјани во Газа кои се дел од оваа операција. Преку тесна и континуирана комуникација со надлежните институции на Египет и Израел како и со нашите државјани, Министерството за надворешни работи е непосредно и континуирано активно вклучен, со цел нашите државјани да бидат безбедно и навремено евакуирани, соопшти вчера МНР, одговарајќи на прашањето од „Слободен печат“ за можноста за евакуација на македонските државјани заглавени во Газа.