Македонската тенисерка Ѓорческа го заврши настапот на турнирите во Анталија
Македонската тенисерка Лина Ѓорческа го заврши настапот во првото коло на ИТФ фјучрсот во Анталија, Турција.
Ѓорческа во првото коло играше против Русинката Александра Шубладзе и загуби со 2:0 во сетови (6:2, 6:3) за 101 минута игра.
Првиот сет беше под целосна контрола резултатски на противничката на Ѓорческа, која поведе со 5:0 и сетот го заврши со 6:2 во гемови. Во вториот сет до 3:3 беше нерешено, а следните три гема ѝ припаднаа на Шубладзе која го доби сетот со 6:3, а со тоа и мечот со 2-0 во сетови.
Слабата реализација на Ѓорческа на брејк топки е причината за поразот. Македонската тенисерка имаше скор од 3/16, додека противничката 6/9.
Поради дождот организаторите на турнирот во Анталија имаа проблеми со програмата, а овој меч требаше да се игра во вторникот.
Ѓорческа следниот настап ќе го има на турнир во Трнава, Словачка.