Македонската слем-поезија доби нов национален претставник
Македонски национален победник во слем-поезија за 2021 година е младиот слемер и изведувач Горазд Китановски – Кени од Скопје. Кени ѝ е познат на македонската јавност по својот поетски перформанс на изведување и читање поезија во автобус на ЈСП во почетокот на годинава, како и по мултидимензионалниот перформанс „Градот убав“, посветен на Скопје (поезија придружена со пијано и изложба на мурали) во соработка со Филип Димишковски и Андреј Павлов, што се одржа во Музејот на современата уметност во рамките на „Бела ноќ“ во 2020 година.
Второ место на слем-натпреварот, што минатиот викенд се одржа во Прилеп, го освои прилепчанецот Никола Дукоски, а третото битолчанката Валерија Дамчевска. Традиционално, победникот ја претставува Македонија на Европското слем-првенство, на кое досега се натпреваруваа Афродита Николова, Игор Трпчески – Трпче, Марија Грубор и Елена Пренџова.
Единаесеттиот национален слем-натпревар се одржа минатиот викенд во киното „Мис Стон“ во Прилеп, а за титулата национален/а победник/победничка се натпреваруваа дваесетина присутни слемер(к)и: Валерија Дамчевска, Габриела Стојаноска – Станоеска, Горазд Китановски – Кени, Дарко Гроздановски, Дафина „Даффне“ Веселиноска, Дијана Петкова, Илијана Ѓоргиева, Ирена Јурчева, Корнелија Јосифова, Константин Карев, Марија Грубор, Марина Икономова Шокева, Никола Дукоски, Оливера Доцевска, Софија Тодороска, Тихомир Јанчовски и Цветанка Колева.
Специјален гостин на вечерта беше данскиот поет Мартин Глас Серуп, чии песни во препев на македонски и на англиски јазик ги читаа Драгица Здравеска, Добрила Грашеска, Цветанка Колева и Билјана Волчевска.
Вовед во настанот беше промоцијата на стихозбирката „Пред некое време“ од Тихомир Јанчовски, чии песни, покрај авторот, ги интерпретираа и Добрила Грашеска и Игор Трпчески – Трпче.
Традиционалниот национален слем-натпревар е во организација на „Театарска работилница“ – Прилеп и Игор Трпчески – Трпче и во коорганизација на Елена Пренџова.